Stad en Stedelig

Parys maak nie maklik met jou vriende nie; dis soos 'n karnaval wat weier om jou te betrek. Jy staan en kyk, staan en wens jy kan deelneem aan die stuk polsende plesier, maar niemand wil jou nader nooi nie. Jy moet eers die wagwoord ken, en dié stad se wagwoord word maar aan enkeles toevertrou.' Met hierdie woorde oor Parys verwoord Chris Barnard die uitdaging waarvoor die vyf-en-twintig skrywers in hierdie essay-bundel te staan gekom het: hulle moes 'n wagwoord soek; daardie vreemd-ontwykende stel eienskappe vind wat aan elke wêreld- stad sy besondere karakter gee. Die resultaat: 'n boeiende mosaïek van stede wat deur die oë van skerpsinnige waarnemers vir die leser nuwe lewe kry - opwindend, dramaties, verfrissend-nuut. Want die sketse en vertellings in hierdie bundel is nie reisbeskrywings in die gewone sin van die woord nie. Dit word 'n intiem-persoonlike terugblik waarin elke skrywer vir hom of haar rekenskap gee van dít wat 'n betrokke stad anders maak as elke ander stad ter wêreld. So word daar geskryf oor die vol, onrustige hartklop van die grootste en bekendste stede: Londen, Parys, Berlyn, New York, Leningrad. Daarnaas die stede van musiek en romanse: Wenen, Venesië, Sevilla. En in direkte teenstelling die Midde-Ooste met sy nou straatmarkte en speserye- geure, of die leser word geneem na die Verre Ooste waar die lewe soos 'n volryp granaat vir die besoeker oopbreek om van te geniet. In al vier windrigtings gaan hierdie seldsame reis – elke stad 'n groot en eie belewenis. In Stad en Stedelig het ons die polsende lewe, nie glanspapier-reisbrosjures nie. *DJ edge wear; Name inscription on first page*