Kodenaam Tau

Ek sit roerloos. Hulle mag my nie sien nie. Ek het twee skote. Hulle is vyf. As hulle my sien, het ek geen kans nie. Ek haal skaars asem. Die naaste stroper is sowat ses meter van my af. Ek kyk doelbewus weg van sy gesig. Kan nie bekostig om oogkontak te maak nie. Ek hou my asem op, vinger op die sneller van my R1. Beweeg asseblief, probeer ek die stroper se spiere beveel. Hy huiwer, buk en krap in die grond. Dan kom hy orent en stap weer aan. Stadig asem ek uit. Hulle beweeg verby. Hou net so aan, asseblief, prewel ek saggies. Die stropers beweeg steeds. Hulle moet aanhou beweeg, want hulle moet hul prooi inhaal. Min wetende die prooi is nou agter hulle. Uit die pen van Johan Fourie, Suid-Afrika se nuwe en opwindende Omgewings misdaadskrywer, kom daar nog 'n aangrypende verhaal wat hom afspeel in Afrika, meer in besonder, Botswana hierdie keer. Met Kodenaam Tau plaas Johan die vinger op die pols van die kommerwekkende handel in leeus wat diereliefhebbers en natuurbewaring organisasies weer warm onder die kraag laat voel. Onlangse nuusberigte het aan die lig gebring dat die beendere van leeus en tiere soortgelyke waarde vir die oorsese mark het as die renosterhoring. Die skelet van 'n leeu kan 'n bedrag van tot R80 000 haal. Syfers wat Omgewingsake bekendgemaak het, toon dat daar 'n 150% groei in uitvoer van leeu produkte na die buiteland was sedert 2009. In 2010 was 153 lewendige leeus uitgevoer, asook 46 leeuvelle, 235 karkasse en 41 skedelbene. Hierdie drastiese groei in leerhandel is kommerwekkend en iets daadwerklik sal aan die probleem gedoen moet word om die wilde leeu populasie te beskerm. Reeds voor 2007 is leeus al van die Kgalagadi streek van Botswana na Suid-Afrika gesmokkel; veral leeuwelpies word gebruik vir teling in gevangenisskap in Suid-Afrika. Sulke leeus kan nie weer vrygelaat kan word in die vrye natuur nie, want hulle sal nie weet hoe om te oorleef in 'n natuurlike omgewing nie. Met sy nuutste spanningsverhaal neem Johan die leser op 'n aksiebelaaide reis deur hierdie donker wereld. Die Xikhova span se pogings om hierdie smokkelhandel te probeer hokslaan, word op 'n aangrypende wyse aan die leser uitgebeeld.