Mobiele Oorlogvoering: 'n Perspektief vir Suider-Afrika

Die primêre tema van hierdie geskrif is MOBILITEIT. Dit is opgestel in die vaste geloof en uit vurige oortuiging dat ‘n Suider-Afrika-krygsmag in die toekoms slegs deur vinnige en doeltreffende optrede, sy wilsopponente op enige slagveld in Suider-Afrika sal kan verslaan. Die gewapende magte van die RSA is steeds na vyf-en-sewentig jaar onoorwonne. Die internasionale persepsie van hierdie mag is resent saaklik en duidelik soos volg gedefinieer : “. .. South Africa has the sixth largest and one of the toughest armies in the world, honed and sharpened by 20 years of anti-ter-rorist bush war on the Angolan/Namibian border . . .” (48:13). Reg of verkeerd, dié krygsmag het reeds sy staal as gedugte oorlogsmasjien in die verlede en hede bewys — iets om op trots te wees en opnuut van kennis te neem. Sedert die Tweede Wêreldoorlog en die Koreaanse Oorlog was die gewapende magte van Suid-Afrika wel nog nie werklik in noemenswaardige grootskaalse konvensionele veldslae betrokke nie. Die vermoë om met durf, oor-tuiging en uiterste doeltreffendheid op te tree, is egter tereg en terdeë tydens onder andere Operasie Protea in Augustus 1981 gedemonstreer. Die RSA is uniek in dié opsig dat hy feitlik geheel en al geisoleerd in die ongenaakbare internasionale arena staan. Dit word allerweë terdeë besef dat sy bronne en vermoëns relatief beperk is. Insgelyks bestaan daar geen twyfel oor die profane oogmerke van die RSA se kommunisties geinspireerde vyande nie. Die RSA staar ‘n veel dimensionele aanslag in die gesig, wat teenswoordig primêr revolusionêr van aard is. Die oorlog woed reeds in alle erns en felheid.