Stem van 'n Profeet

Reeds in sy eie leeftyd al was die alombekende Boereprofeet, Siener van Rensburg, hiér en in die buiteland 'n soort legende. Genls. De Wet en De La Rey het geglo hy is 'n ware profeet, terwyl staatsmanne soos genl. Hertzog, Louis Botha en Jan Smuts selfs in die Parlement getuig het hoedat van oom Nieklas se 'gesigte' bewaarheid is. Siener van Rensburg was, volgens alle beskikbare getuienis, n ware profeet, 'n diep gelowige Christen en hy het sy gawe van profesie ook nooit vir eie gewin gebruik nie. Hy is reeds in 1926 oorlede, maar tot vandag toe word hy gereken as een van die merkwaardigste persoonlikhede in ons geskiedenis. Vanaf 1871 tot en met sy dood in 1926 het die Siener 700 of meer gesigte of visioene gehad oor die toekoms van die Boerevolk, ander nasies en ook wêreldgebeure. In 1918 profeteer hy hierdie ontstellende woorde: "Ek sien daar kom 'n tyd dat die hele wêreld omgeploeg is (die uitbreek van die Derde Wêreldoorlog, en dinge is baie deurmekaar). Dan sien ek oor die omgeploeg de land lê 'n slang. Ek sien nie sy kop of stert nie (niemand sal presies weet wat aan die gang is nie. In die kerk sal dinge ook baie deurmekaar wees). Juis dan sien ek my dogter Anna sit en skryf. Toe weet ek: In daardie tyd sal niemand ook kop of stert van my gesigte kan uitmaak nie, want die een sal sê: Oom Klasie het só gesê, en 'n ander een sal stry: Nee, hy het sus gesê. Van toe af het ek my dogter gevra om elke dag se visioene neer te skryf.sodat almal eendag kan weet."